चितवन, असोज २३ । जिल्ला प्रहरी कार्यालय चितवनले जिल्लाका विभिन्न स्थानमा व्यक्तिहरुलाई बेहोस बनाइ लुटपाट गर्ने दुईजनालाई पक्राउ गरेको छ ।प्रहरीले मंगलबार पत्रकार सम्मेलन गरी मकवानपुरको थाहा नगरपालिका घर भएका ४९ वर्षीय हरि गोले र कास्की, माछापुच्छ्रेका ‘गोपाल’ भनिने कालु परियारलाई सार्वजनिक गरेको हो ।
उनीहरुको साथबाट बेहोस बनाउने औषधि, इन्जेक्सन, टर्च, जुसको बोतललगायत बरामद गरेको प्रहरीले जनाएको छ । जिल्ला प्रहरी कार्यालय चितवनले गोलेलाई नारायणगढको आँपटारी र कालु परियारलाई बुटवल बसपार्कबाट पक्राउ गरिएको जनाएको छ ।
प्रहरीले कालुबाट बेहोस् बनाउने औषधि, टर्च, जुससमेत बरामद गरेको थियो ।
पक्राउ परेकालाई ज्यान मार्ने उद्योग र चोरी कसुर अन्तर्गत कानुनी कारबाही अगाडि बढाइएको जिल्ला प्रहरी कार्यालयका प्रवक्ता तथा डीएसपी प्रभुप्रसाद ढकालले जानकारी दिए ।
प्रहरीका अनुसार गत शुक्रबार राति माडी नगरपालिका ६ कल्याणपुरमा दिनभरि अमिलो बेचेर भीमबहादुर सुनारको घरका सदस्यहरुलाई आँपको जुस भन्दै विषादी हालेको जुस खुवाएर १५ तोला सुनका गरगहना, दुई थान मोबाइल सेट लुटेर फरार भएका थिए ।
