२४ पटक सर्वोच्च शिखर सगरमाथाको सफल आरोहण गरेर कीर्तिमान बनाएका साहसिक आरोही कामिरिता शेर्पा शनिबार काठमाडौँ आइपुगेका छन् ।
उनी लुक्काबाट हेलिकप्टरमा त्रिभुवन विमानस्थलमा उत्रिदा आफन्त तथा समर्थकले खुसी मनाउँदै भव्य स्वागत गरेका थिए । विशेषगरी शेर्पा समूदाय उनलाई खादा लगाएर सम्मान गर्न लामबद्ध देखिन्थे । उनको भव्य स्वागतपछि राष्ट्रिय झण्डासहितको गाडीमा राखेर निवासतर्फ लगिएको थियो ।
कामिरिताले जेठ ७ गते सगरमाथाको २४ औँ पटक सगरमाथाको सफल आरोहण गरेका थिए । त्यसको एक साताअघि पनि उनले सगरमाथाको सफल आरोहण गरेका थिए । लामो समयदेखि आरोहण क्षेत्रमा रहेका सोलुखुम्बु थामेका ४९ वर्षीय शेर्पाले सबैभन्दा धेरै पटक सगरमाथा चढेर विश्व रेकर्ड समेत बनाएका छन् ।
सन् १९९४ मा पहिलोपटक सगरमाथाको आरोहण गरेका कामीरिताले २५ पटक चुचुरोमा पुगेपछि आराम गर्ने बताएका छन् । शेर्पाले आरोहण कठिन हुने भए पनि आफूलाई सामान्य लाग्ने प्रतिक्रिया दिने गरेका छन् ।
